DOMIN LA PÁR HO ESTÉTIKA

DOMIN LA PÁR HO ESTÉTIKA

 Iha loron ida, hau koko atu hatuur domin ho estétika iha meza leten maibé ida sempre monu-tuun husi leten. Liuliu domin. Ah, tanba sa?  atu halakon kuriozidade ne’ebé hamoras uluk-fatuk, Hau hamutuk ho lokraik iha jardín sidade atu refreshing hanoin. Entre hau ho lokraik iha tan ema ida maibé  ikuikus ne’e hau rona nia mak Finálista Miss Timor Leste iha tinan kotuk liu-ba.

Baihira hau haree ba lokraik ninia matan, iha loron matan monu husi ne’ebá, ninia abut hamoris hela ai-funan buras jirasÓl no husi ninia nanál hau rona manu-fuik hananu. Ida ne’e mak natureza naturál ne’ebé hamout hau ba ninia furak, la iha tan didin-lolon atu hafahe ami. Saida mak hau haree daudauk iha leten la hanesan ho saida mak hau atu konta ba imi.

Ex Finálista Miss Timor Leste ne’e na’ok hau nia laran iha primeira vista (pandangan) hamonu hau ba ninia isin furak ne’ebé nakle’uk bá-mai hanesan estrada subaun. Halo hau la dukur ba ninia furak (obsession) no se karik, hau mak na’in ba nia! Hau sei rai metin iha mala osan-mean nia laran (possessive). Hau bilán, bainhira labele mout ba ninia furak  hanesan lokraik iha jardín. Sira hatete katak hau komesa harii didin-lolon entre hau ho nia, didin-lolon ne’e sira hanaran advantage.

Husi meskita estrada-sorin, hau komesa rona adzan magrib.  Nein lisensa, lokraik husik tia ona hau iha oras ida liu-ba. Nia husik hau ho dame no hakmatek (art is experience and liberation). Ho orgullu, hau pinta kokraik ninia oin furak hanesan tuir mai lokraik ninia furak ne’ebé  hakat liu-ba halo hau apresia no mout hamutuk. La iha tan distánsia entre sujeitu ho objetu (la iha didin-lolon).

Benefisiu husi odamatan jardín ne’ebé kloot habesik ami fihir, hau nia matan ho menina (Miss Timor Leste) ninia matan sai ida. Hau nia fuan-laran hanesan tsunami. Hau hakarak fihir ba tempu naruk. Sira konta mai hau, Ida ne’e mak karakterístika  ida husi  domin (egocentric). Domin sempre hanoin rezultadu (advantage). Domin hamosu didin-lolon entre sujeitu ho objetu, Domin la hanesan ho lokraik iha jardin. Lokraik ninia furak fÓ estétika ne’ebé livre.

Husi dook ne’ebá, tenda nasi goreng komesa harii ba kabun sira ne’ebé hamlaha. Hau nia laran komesa taridu ba domin ho estétika ne’ebé  mesamesak iha uma. Hafoin to’o destinu la iha mudansa, domin sei nafatin husik estétika ho distánsia vertikál. Hau mÓs komprende katak domin nunka mais pár ho estétika.